\name Gullah
De Law teacha ansa Jedus say, De Law say, 
Mus lobe de Lawd you God wid all you haat an wid all you soul. 
Mus lobe um wid all you strengk an wid all you mind. 
An mus lobe you neighba de same way you lobe yousef.
28 Jedus say, "You ansa right, fa true. 
Ef you do dem ting, you gwine libe faeba." 
29 De Law teacha beena want fa sho Jedus e right fa taak wa ting e taak, so e aks Jedus say, "Whodat me neighba?" 
30 Jedus ansa um say, "One time a man beena gwine down from Jerusalem ta Jericho. Wiles e beena gwine, some robba layway um. Dey gang um an strip off e clothes. Den dey beat um op til e been mos ded.An dey gone an lef um dey een de road.
31 A Jew priest happen ta come down de road. Wen e see de man on de groun dey, e cross oba ta de oda side ob de road an gone.
32 Same fashion, a Levite, a Law teacha, come ta de place weh de man 
been een de road. Wen de Levite git dey an shum, e cross oba ta de oda side ob de road an gone too.
33 Bot one stranja wa come from Samaria beena trabel long dat road. Wen e git dey an e see de man wa de robba beat op, e feel real saary fa um.
34 E gone oba ta de man. E pour medicine, ail an wine, een de cut weh de robba done beat um op. E wrop op de cut. Den e pit de man on e own mule, cyah um ta a bodin house. An e stay dey wid um an nuss um.
35 Nex day wen de man from Samaria git ready fa go, e call de man wa ron de bodin house. E gem money, two silba coin, an e tell um say, 'Mus take cyah ob dis  man fa me. Waeba mo e cost A gwine pay you wen A git baak.'"
36 "Now den," Jedus aks de Law teacha, say, "Wa you tink? Wish one dem tre man sho e been a neighba ta de man wa git rob?"37 De Law teacha ansa Jedus say, "De stranja from Samaria, e de one wa sho mussy on de man wa been rob." Jedus tell um say, "Mus go an do de same."